Tæplega 26.000 manns hafa skrifað undir mótmæli á þátttöku Íslands í Eurovision á næsta ári. Ástæðan er að keppnin verður haldin í Ísrael og telja þeir sem skrifa undir áskorunina að það sé ekki siðferðislega verjandi að taka þátt á meðan Ísrael fremur mannréttindabrot.

Raphael Schutz, sendiherra Ísraels, hefur áhyggjur sínar af þeim hörðu viðbrögðum sem sigur landsins í Eurovision hefur vakið hér á landi og óttast að fleiri lönd geri hið sama. Schutz hitti forsvarsmenn RÚV á dögunum með þeim tilgangi að ræða mótmælin og framhaldið.

Jóhann Hlíðar Harðarson, fréttamaður RÚV, fullyrðir í samtali við The Jerusalem Post að tæplega 26 þúsund undirskriftir sé há tala miðað við fjölda íbúa á Íslandi. „Ekkert hefur verið ákveðið enn,“ segir hann. „Ég efa að Ísland ákveði neitt eitt og sér. Þetta verður að öllum líkindum rætt með öðrum Norðurlöndum áður en ákvörðun verður tekin.” Eftir fundinn með RÚV sagðist Schutz vera „hóflega bjartsýnn“ fyrir niðurstöðunni samkvæmt fréttamiðlinum.

Þess má geta að Mícheál MacDonncha, borgarstjóri Dublin, lýsti því yfir í írskum fjölmiðlum að Írar ættu að sýna samstöðu með Palestínumönnum og neita þátttöku og hefur fjöldi Svía kallað eftir því að ríki þeirra sendi ekki fulltrúa í keppnina.