Hinn umdeildi breski aðgerðasinni, Tommy Robinson, var handtekinn fyrir utan dómshús í Leeds í gær og dæmdur aðeins nokkrum klukkustundum síðar í 13 mánaða fangelsi. Var honum gefið að sök að ógna almannafriði er hann lét mynda sakborninga í kynferðisbrotamáli.

Tommy, sem þekktastur er fyrir baráttu sína gegn íslamisma á Bretlandi og afar umdeildur vegna framgöngu sinnar í þeirri baráttu, er nú um stundir einna þekktastur hér á landi fyrir að hafa ekki mætt til Íslands á fyrirlestur sem hann hafði samið um að halda í Reykjavík þann 17. maí. Samtökin Vakur stóðu að samkomunni en skýringar sem aðstoðarmenn Tommys gáfu á vanefndunum þóttu grunsamlegar.

Forsaga atviksins í gær er sú að í fyrra var Tommy dæmdur í skilorðsbundið fangelsi fyrir sambærilegt brot. Hann myndaði þá meinta kynferðisbrotamenn er þeir komu að dómshúsi auk þess að ausa yfir þá svívirðingum. Í gær veittist Tommy ekki að sakborningunum en spurði tvo þeirra nokkuð hlutlausra spurninga. Hann lét hins vegar mynda fyrir utan dómhúsið í meira en klukkustund og sýndi beint á Facebook-síðu sinni.

Áhugi Tommys á réttarhöldunum tengist andófi hans gegn íslam á Bretlandi. Málið sem réttað var í flokkast undir svokölluð „grooming gangs“ mál þar sem menn hafa með skipulögðum hætti tælt unglingsstúlkur og stúlkubörn niður í 11 ára aldur, misnotað kynferðislega, misþyrmt og gert út í vændi. Stór hluti sakborninga í slíkum málum eru múslimar, flestir frá Pakistan. Samtökin Quillan Foundation, sem eru stofnuð af múslimum, birtu skýrslu um þessa glæpi í lok síðasta árs sem sýnir að 84% sakfelldra manna í kynferðisbrotamálum af þessu tagi á Bretlandi frá árinu 2005 séu frá Asíu. Hvítir, karlkyns innfæddir Englendingar séu meirihluti gerenda í kynferðisbrotum gegn börnum en þeir séu yfirleitt einir að verki á meðan Asíubúarnir bindist samtökum um þessa iðju.

Fréttabann á Englandi um málið

Þar sem Tommy telst hafa rofið skilorð með myndatökunum og afskiptunum af sakborningunum í gær var refsingin sem hann var dæmdur til í fyrra fullnustuð. Stuðningsmenn Tommys óttast um velferð hans í fangelsi þar sem hann á sér marga hatursmenn á meðal íslamskra afbrotamanna.

Fréttir af handtökunni í gær voru í mörgum fjölmiðlum, bæði hefðbundnum fjölmiðlum og jaðarmiðlum sem hliðhollir eru Tommy Robinson og skoðunum hans. Hins vegar er ekki að sjá neinar fréttir í enskum miðlum um fangelsisdóminn. Dómarinn gaf út tilskipun um fréttabann á dóminn þar til dæmt hefur verið í máli hinna meintu barnaníðinga. Yfirlýstur tilgangur með því er að koma í veg fyrir að höfð séu áhrif á dómsniðurstöðu í því sakamáli.

Fylgismenn Tommys komust í gær yfir afrit af fréttabannsúrskurðinum og birtu skjáskot af honum á Twitter sem sjá má hér að neðan. Athugið að Tommy Robinson heitir réttu nafni Stephen Yaxley Lennon:

Myndaði eigin handtöku

Tommy Robinson myndaði og sýndi beint á Youtube frá handtökunni í gær og má því sjá atvikið í spilaranum hér að neðan:

https://www.youtube.com/watch?v=K9gG4vkS-Xc