„Fyrr í sumar var ungur stórglæpamaður staðinn að verki við iðju sína um miðja nótt í miðborg Reykjavíkur. Sem betur fer náði vökull öryggisvörður að átta sig á hvaða óafturkræfi glæpur var að fara að eiga sér stað þarna og hringdi í lögregluna sem brást hratt við.“

Þannig hefst pistill á Vísi eftir Helgu Völu Helgadóttur lögmann sem fjallar um ungan „stórglæpon.“ Óhætt er að fullyrða að þar gagnrýni lögmaðurinn refsistefnu þegar kemur að fíkniefnamálum, eða neysluskömmtum. Þær raddir verða æ háværari sem vilja taka upp aðra stefnu þegar kemur að fíkniefnamálum og vilja afglæpavæða einkaneyslu á fíkniefnum. Þá hafa Píratar sagt að einkaneysla sé heilbrigðisvandamál, ekki vandamál dómstóla.

Helga Vala heldur áfram:

„Stórglæpamaðurinn, sem setið hafði við iðju sína, reis á fætur og bjóst til ferðar enda vildi hann síður lenda í vandræðum þarna um miðja nótt, einn síns liðs, með lögregluna allt um kring. Sem betur fer náði lögreglan að yfirbuga glæponinn, skella honum niður á jörðina og festa hendur í járn. Var hann því næst dreginn inn í lögreglubíl og skutlað upp á lögreglustöðina við Hlemm, enda mikilvægt að stöðva brotaferilinn.“

Fékk ekki að hringja í mömmu

Helga Vala segir að glæponinn búi í foreldrahúsum. Hann hafi óskað eftir að hringja í móður sína svo hún myndi ekki óttast um son sinn. Það fékk hann ekki, að sögn Helgu Völu, sem segir lögregluna hafa tjáð piltinum að móðirin kynni því líklega illa að vera vakin upp um miðja nótt.

„Ungi stórglæpamaðurinn fékk því að dúsa í leyni í fangaklefa næstu 10 klukkustundir,“ segir Helga Vala og ljóst að með þessari sögu vill hún að tekin verði um breytt stefna í þessum málaflokki.

„Sá glæpur sem kallaði á svo fumlaus vinnubrögð lögreglu og öryggisvarðar var að ungi stórglæponinn var við það að kveikja sér í jónu, tóbaksblönduðu maríjúana, sem hann hafði keypt sér á djamminu. Annað gerði hann ekki og glæpurinn því jónan í brjóstvasanum. Við skulum vona að lögreglan hafi ekki horft framhjá öðrum og stærri glæpum á meðan hún fangelsaði þennan stórglæpamann í sumarnóttinni.“