Snjallsímaleikurinn ReRunners, sem framleiddur er af íslenska tölvuleikjafyrirtækinu Klang Games, kom út í dag fyrir Android eða iOS snjalltæki um allan heim. Hægt er að nálgast leikinn í smáforritaverslununum App store og Google Play.

ReRunners er tvívíður „platform jump-and-run“ tölvuleikur. Í leiknum hleypur spilarinn, hoppar upp og niður framhjá ýmsum hindrunum og safnar hlutum, á leið sinni í átt að marki borðsins. En það sem er óvenjulegt við ReRunners er að þrautabrautina þarf maður að hlaupa í kapp við aðra spilara leiksins.

Leikurinn er sá fyrsti frá tölvuleikjafyrirtækinu Klang Games sem var stofnað árið 2013 af þremur Íslendingum búsettum í Berlín í Þýskalandi, Guðmundi Hallgrímssyni, listamanni og fatahönnuði, Ívari Emilssyni og Odd Snæ Magnússyni, en þeir tveir síðarnefndu höfðu meðal annars starfað við tölvuleikjaframleiðslu hjá CCP. Davíð Magnússon vinnur hljóðin en auk hans koma Gunnar Tynes úr Múm, og Mike Shroud úr Ratatat að gerð tónlistarinnar.

Sjáðu meira: Í súrrealískum hugarheimi Klang.