Súkkulaðigerðin Omnom Chocolate hefur nú opnað splunkunýjar höfuðstöðvar að Hólmaslóð 4 úti á Granda. Á undanförnum tveimur og hálfu ári hefur Omnom súkkulaðigerðin notið sívaxandi vinsælda og hefur framleiðslan verið aukin samhliða því. Frá upphafi hefur verksmiðjan verið til húsa í gömlu bensínstöðinni við Austurströnd en vegna plássleysis hefur fyrirtækið nú flutt á nýjan og stærri stað. Jafnhliða súkkulaðigerðinni hefur verið opnuð súkkulaðibúð á Hólmaslóðinni og einnig er til staðar kynningaraðstaða fyrir áhugasama súkkulaðiunnendur.

„Að fá að opna fyrstu súkkulaðibúðina á Íslandi er einstök upplifun,“ segir María Sif Daníelsdóttir, verslunarstjóri hjá Omnom, yfirleitt kölluð Mæja. Hún segir að viðskiptavinir verslunarinnar fái tækifæri til að kynnast framleiðslunni á súkkulaðinu:

„Þegar gengið er inn í verslunina blasa við glerveggir þar sem sést vel inn í sjálfa súkkulaðigerðina. Við fræðum fólk um framleiðsluna og sýnum því hvað er í gangi í gegnum glerið. Við bjóðum fólki að smakka og segjum frá ferlinu, frá kakóbaununum, hvernig súkkulaðið verður til, hvaðan við fáum okkar baunir, og svo framvegis,“ segir Mæja og bendir á að Omnom flytur ekki inn kakómassa heldur sjálfar kakóbaunirnar og vinnur súkkulaðið úr þeim:

„Við flytjum inn baunir frá Madagaskar og Tansaníu. Við ristum baunirnar sjálf og framleiðsluferlið okkar er alla leið frá baun yfir í súkkulaðiplötuna. Varan er handgerð og okkar viðskiptavinir vita nákvæmlega hvað þeir eru að kaupa.“

Vitund um hollustu súkkulaðis hefur farið vaxandi undanfarin ár og ljóst er að ákveðnar gerðir af súkkulaði sem lausar eru við hvítan sykur eru hollar. Mæja nefnir sem dæmi að dökkt súkkulaði frá Omnom sé afar hollt. Ennfremur inniheldur allt súkkulaði frá Omnom eingöngu lífrænan hrásykur en ekki viðbættan hvítan sykur.

Vinsæl skemmtun hjá hópum

„Við bjóðum upp á súkkulaðitúra. Þá getur fólk komið hingað í hópum sem fara þá inn í sérstakt kynningarherbergi, þar sem gestir fá fræðslu og smakka á kakóbaun. Við sýnum ferlið, göngum um verksmiðjuna og endum síðan á versluninni þar sem fólk fær að gæða sér á súkkulaði.“

Mæja segir að hún hafi fengið hópa allt frá fimm upp í 25 manna en þetta er vinsæl skemmtun hjá til dæmis fyrirtækjahópum, vinkvennahópum og í gæsunum.

Súkkulaðibúðin á Hólmaslóð 4 er opin alla virka daga frá kl. 11 til 18 og 11 til 14 á laugardögum.

Þeir sem hafa áhuga á að panta súkkulaðitúra eða fá frekari upplýsingar um Omnom súkkulaðigerðina er bent á vefsvæði fyrirtækisins (á ensku) og símann 519 5959 þar sem tekið er við fyrirspurnum.

Omnom er margverðlaunað súkkulaði: Núna í vikunni vann Omnom súkkulaði til þriggja gullverðlauna og einna silfuverðlauna í keppninni European Bar semi-final Competition. Sjá nánar hér.