Á dögunum greindi DV frá því að Naustavör ehf., sem er í eigu Sjómannadagsráðs, hefði sagt upp leigusamningi við fimm leigutaka og gert þeim að yfirgefa leiguíbúðir sínar í Boðaþingi í Kópavogi á þessu ári. Leigutakarnir áttu það sameiginlegt að hafa neitað að skrifa undir nýja leigusamninga.  Ástæða þess var sú að í þeim var ákvæði þess efnis að leigutakarnir myndu afsala sér skaðabótum sem héraðsdómur hafði dæmt þeim vegna ofgreiddra húsgjalda. Um verulegar upphæðir var að ræða en hver leigutaki átti rétt á um 500 þúsund króna endurgreiðslu.

Ein af þeim sem sér fram á að missa húsnæði sitt er hin 89 ára gamla Svava Gunnlaugsdóttir en DV fjallaði um hennar mál um miðjan aprílmánuð. Þá var Svava í mikilli óvissu varðandi framhaldið og hafði, að eigin sögn, árangurslaust reynt að afla sér upplýsinga um stöðu sína.

Frétt DV vakti talsverða athygli en varð þó ekki til þess að forsvarsmenn Naustavarar brygðust við með einhverjum hætti. Svava er enn í óvissu ásamt hinum leigutökunum og hafa engar fregnir fengið. Inga Sæland, formaður Flokks fólksins, sá að við svo búið mætti ekki una og hún fundaði með Svövu og félögum hennar á dögunum. Niðurstaðan varð sú að Svava skrifaði undir umboð þess efnis að Inga myndi sjá um hennar mál.

„Ég er gersamlega orðlaus gagnvart þeirri mannvonsku sem hér er á ferð og mun gera allt sem í mínu valdi stendur til að hjálpa þessu fólki og leiðrétta þetta gífurlega óréttlæti sem þau eru beitt,“ skrifaði Inga á Facebook-síðu sína og ljóst er að forsvarsmenn Naustavarar ehf. eiga ekki von á góðu.