Sigga Beinteins varð fyrir milljónatjóni: „Það er allt ónýtt hjá mér“
Tónlistarkonan Sigríður Beinteinsdóttir, betur þekkt sem Sigga Beinteins, segir ljóst að allt sem hún geymdi í húsnæði Geymslna í Miðhrauni sé ónýtt. Mikill eldur kom upp í húsinu fyrr í þessum mánuði og misstu fjölmargir hluta af eigum sínum í brunanum.
„Það er allt ónýtt hjá mér,“ segir Sigríður í samtali við RÚV. Hún hefur nú fengið myndir af því sem náðist úr húsinu en það sé allt saman ónýtt. Það versta við svona bruna sé ekki endilega eldurinn, heldur vatnið og sótið. „Lyktin fer ekkert af þessu.“
Sigríður geymdi í húsinu muni sem tengjast árlegum jólatónleikum hennar. Má þar nefna búninga, leikmuni og sviðshluti svo eitthvað sé nefnt. Sigríður sagði að hún ætti eftir að fá upplýsingar frá tryggingunum um hversu mikið hún fái bætt, en ljóst sé að tjónið hlaupi á milljónum.
