„Góða kvöldið, Benjamín Þór hérna. Mig langar að tjá mig um mál sem hefur brunnið sterkt i brjósti mér síðastliðna mánuði. En það varðar samband mitt og Hilmars Leifssonar.“ Með þessum orðum hefst einlæg Facebook-færsla Benjamíns Þórs, betur þekktum sem Benni Ólsari, sem birtist nýlega á samfélagsmiðlinum.

Eins og DV hefur fjallað um þá hafa harðvítugar deilur geisað undanfarin ár milli Hilmars og hóps sem Benjamín tilheyrði. Meðal annars urðu Hilmar og Benjamín Þór báðir fórnarlömb líkamsárása sem rekja má til ósættisins.

Biðst opinberlega afsökunar

En nú kveður við annan tón og Benjamín vildi setja endapunktinn við deilurnar. Hann heimsótti því Hilmar á heimili þess síðarnefnda ásamt lögmanni og rétti honum sáttarhönd. „Ég og Hilmar vorum góðir vinir í mörg ár en ég missteig mig í samskiptum við hann fyrir allnokkru síðan. Ég vil því biðjast afsökunar opinberlega á ljótum orðum sem ég hef sagt í garð hans og fjölskyldu hans og ónæði sem ég hef valdið þeim. Ég hef farið á fund með Hilmari og fjölskyldu hans ásamt Jóni Egilssyni hæstaréttarlögmanni til þess að útkljá þessi mál. Ég vona að þið takið þessari afsökunarbeiðni, kæra fjölskylda“ segir Benjamín Þór í færslunni.

Ímyndað leikrit

„Ég er búinn að slíðra sverðin gagnvart honum og fyrirgefa honum. Ég tók í þessa útréttu hönd því að afsökunarbeiðnin var einlæg og það lá greinilega iðrun að baki henni. Hann vildi bæta líf sitt,“ segir Hilmar Leifsson í samtali við DV. Hann segir að hinn meinti ófriður hafi verið blásinn upp sem eitthvert stríð en það hafi verið fjarri sannleikanum. „Þetta var fyrst og fremst óþarfi og í raun kjánalegt. Það var þöngulhaus sem vildi hrifsa einhverja ímyndaða kórónu í einhverju leikriti sem ég var ekki þátttakandi í,“ segir Hilmar. Um var að ræða vin Benjamíns sem gerði það að verkum að hann flæktist inn í deilurnar. Hilmar kveðst því ekki hafa verið í neinu stríði en að ástandið hafi á köflum verið hvimleitt þar sem ung börn eru á heimilinu.