Dj Grill: Heimili hamborgarans á Akureyri!

Dj Grill er heimilislegur og jafnframt vinalegur hamborgarastaður í miðbæ Akureyrar. Þangað er notalegt að koma með fjölskyldunni, setjast niður í rólegheitum og fá sér safaríkan hamborgara, girnilega samloku eða aðra smárétti.
Ingi Þór Stefánsson segir að vinsælt sé að skjótast á Dj Grill í hádegishléinu til að fá sér snögglega framreiddan, gómsætan borgara. „Hingað er líka gott að koma og horfa á boltann þar sem hægt er að sjá flesta leiki sem eru á dagskrá enska boltans og eins meistaradeildarinnar.“

##Flott fjölskyldufyrirtæki
Hjónin Elva Sigurðardóttir og maðurinn hennar, Snæbjörn Sigurðsson, ákváðu að slá til fyrir átta árum og tóku við rekstri staðarins – einmitt rétt fyrir verslunarmannahelgina. „Þetta gekk mun betur en nokkur hafði þorað að vona,“ segir Ingi Þór brosandi. „Staðurinn hefur tekið miklum breytingum síðan árið 2008, bæði útlitslega og einnig hvað varðar veitingar á matseðli. Fjölskyldan okkar er nánast öll með annan fótinn á svæðinu en starfsmannahópurinn stækkar ört eftir því sem starfseminni vex fiskur um hrygg.“

Zurgbassi er langvinsælastur

„Staðurinn á nú orðið stóran fastakúnnahóp en sem betur fer sjáum við líka mörg ný andlit,“ segir hann og nefnir að það gleðji ávallt jafn mikið að fá utanbæjarfólk sem kemur aftur og aftur í heimsókn á Dj Grill þegar leið þess liggur til Akureyrar.

„Ostborgarinn okkar er uppáhald margra en sá borgari sem hefur algjörlega slegið í gegn er hinn svokallaði Zurgbassi sem er sá allra, allra vinsælasti á seðlinum. Sá eðalborgari er með piparosti og fleira góðgæti. Flestir hamborgararnir hjá okkur hafa stafina Dj fyrir framan; Dj Maggi, Dj Hulda og svo framvegis. Ástæðu þess má rekja til þess að þegar fjölskyldan tók við staðnum voru þetta helstu nöfnin sem voru að spila á Akureyri á þeim tíma. Zurgbassi er t.a.m. sviðsnafnið sem ég og vinur minn notuðum þegar við vorum að spila.“