Hér má lesa skýrslu nefndar um rekstrarvanda einkarekinna fjölmiðla. Þetta er langt og ítarlegt plagg, heilar 70 blaðsíður. Fjölmiðlar hafa birt niðurstöður nefndarinnar í nokkrum liðum. Það hefur þó lítt komið fram að nefndin klofnaði. Í henni sátu fimm einstaklingar, formaður var Björgvin Guðmundsson, fyrrverandi ritstjóri, nú almannatengill hjá KOM.

Ef lesið er aftur á blaðsíðu 50 má sjá álit minnihluta nefndarinnar, Elfu Ýrar Gylfadóttur, framkvmdastjóra fjölmiðlanefndar,  og Hlyns Ingasonar, lögfræðings og fulltrúa  fjármála- og efnahagsráðuneytisins.

Þau gjalda varhug við því að taka Ríkisútvarpið af auglýsingamarkaði eins og nefndin leggur til. Nefna þau nokkrar ástæður, meðal annars þá að allsendis sé óvíst að auglýsingatekjurnar muni skila sér til einkareknu fjölmiðlanna og einnig að þarna sé mikil hætta á því að Ríkisútvarpið veikist til muna:

Á Norðurlöndunum er rekstrarvandi fjölmiðla fyrst og fremst rakinn til alþjóðavæðingar, aukins vægis samfélagsmiðla og leitarvéla í birtingu auglýsinga og breyttrar fjölmiðlanotkunar
almennings m.a. með tilkomu snjalltækja. Fyrir liggur að þessi þróun hefur raskað tekjumódelum fjölmiðla. Samkvæmt framansögðu er það álit minnihlutans að sú tillaga meirihluta nefndarinnar að RÚV hverfi alfarið af auglýsingamarkaði sé ekki nægjanlega ígrunduð og að draga megi í efa að hún sé til þess fallin að bæta stöðu einkarekinna fjölmiðla hér á landi.

Elva og Hlynur eru líka efins um að leyfa skuli áfengis- og tóbaksauglýsingar eins og meirihluti nefndarinnar leggur til:

Börn og ungt fólk er í auknum mæli að horfa á, hlusta á og lesa efni í erlendum fjölmiðlum og samfélagsmiðlum þar sem sömu takmarkanir eru ekki að finna á áfengis- og tóbaksauglýsingum og hér á landi. Minnihlutinn telur ekki ljóst hvaða áhrif slíkar breytingar á markaðssetningu myndu hafa á almenning og þá sérstaklega á börn og ungmenni. Það er því mat minnihlutans að
nauðsynlegt sé að ítarleg könnun og greining fari fram á áhrifum þess að heimila áfengisog tóbaksauglýsingar áður en unnt er að leggja til að heimilt verði að miðla áfengis- og
tóbaksauglýsingum hér á landi. Þá sé þörf á að rannsaka og greina hvort að afleiddur kostnaður í heilbrigðiskerfinu myndi aukast meira en því sem nemur auknum tekjum íslenskra fjölmiðla. Ef svo er þyrfti að skoða hvort hægt væri styðja við fjölmiðla með öðrum hætti, frekar en með aðgerðum sem að auka afleidd útgjöld ríkisins og eftir atvikum hafa neikvæð áhrif á lýðheilsu þjóðarinnar.

 

Elfa Ýr Gylfadóttir, framkvæmdastjóri fjölmiðlanefndar, er ásamt Hlyni Ingasyni, fulltrúa fjármála- og efnahagsráðuneytis, efins um að taka eigi RÚV af auglýsingamarkaði og að leyfa eigi birtingu áfengis- og tóbaksauglýsinga.