Líklega hefur enginn þingmaður í sögunni talað jafnmikið úr pontu Alþingis og Steingrímur J. Sigfússon. Hann hefur ábyggilega talað miklu meira en sá sem næstur kemur á sínum þrjátíu og fjögurra ára þingferli. Og nú er sagt að samstaða sé um það meðal tilvonandi stjórnarflokka að Steingrímur verði forseti Alþingis – hann verður semsagt ekki ráðherra í þessari umferð.

Það fer ábyggilega vel á því að Steingrímur verði þingforseti, hann hefur gríðarlega reynslu úr Alþingi og þekkir störfin þar út og inn. Það hefur reyndar verið orðrómur um það að Steingrím hafi langað í þetta embætti.

Forseti Alþingis er ekki slæmt djobb. Forsetinn nýtur fríðinda sem ráðherrar hafa, hefur meðal annars bíl og bílstjóra. Og eitt enn – forsetinn fær af sér málverk sem er hengt upp í sölum Alþingis. Til að mála eru fengnir sérstakir portrettmálarar. Eitt sinn tíðkaðist mjög að mála myndir af fyrirfólki, helst körlum auðvitað, en kannski er þetta síðasta vígi portrettmálunar? Steingrímur mun semsagt horfa af veggjum þingsins á þingheim framtíðarinnar – á staðnum þar sem hann hefur starfað og talað lengur en gengur og gerist.