Það er afskaplega viðkvæmur tími í stjórnarmyndunarviðræðum. Flokksleiðtogar fóru austur fyrir fjall, á heimili Sigurðar Inga Jóhannssonar í Syðra-Langholti. Manni skilst að fyrir kosningarnar hafi þeir verið búnir að ræða mögulega stjórnarmyndun sín á milli.

Þá leit út fyrir að meirihlutinn yrði stærri – nú er hann bara einn maður. Og örugglega ástæða til að stíga varlega til jarðar. Það er enn hægt að slíta þessum viðræðum, hvort sem það yrði vegna málefna eða vegna vantrausts. Flokkarnir eiga kannski ekki annan kost en að reyna þetta, en það er ekki þar með sagt að úr verði stjórn.

Í dag hafa verið tvær fréttir af einum hugsanlegara stjórnarflokka, Pírötum,  í fjölmiðlum. Annars vegar er það Birgitta Jónsdóttir sem líkir Sjálfstæðismönnum við kakkalakka og Framsóknarmönnum við fiskiflugur.

Birgitta er horfin af þingi, en hún er enn mikil áhrifamanneskja í röðum Pírata.

Hins vegar er það þingmaðurinn Björn Leví Gunnarsson sem notar þennan dag, daginn sem stjórnin er máski að fæðast, til að setja alls kyns fyrirvara. Sumt af því er kannski sjálfsagt mál, en tímasetningin getur varla talist vera góð.