Hér á vefnum spunnust nokkuð heitar umræður vegna greinarkorns sem ég birti í gær um nýjan stúdentagarð við Hringbraut. Eins og kunnugt er hefur stjórn Háskólans slegið byggingu hans á frest.
Ég var sakaður um að vilja ekki að ungt fólk og stúdentar fengju þak undir höfuðið – meðal þeirra sem gengu mjög hart þar fram var ungt fólk úr röðum Pírata.
Píratar hafa verið í borgarstjórn í Reykjavík síðustu fjögur árin og eru í betri aðstöðu en ég til að leysa húsnæðisvanda ungs fólks.
Greinin sem ég setti saman var einungis skrifuð út frá skipulagssjónarmiðum. en auðvitað rekast þau oft á við hraða uppbyggingu húsnæðis. Menn hafa ekki viljað fara þá leið að rusla upp nýju úthverfi á mörkum borgarlandsins eins og gert var áður fyrr þegar húsnæðisástandið var slæmt. Það verður ábyggilega tekist á um þetta í borgarstjórnarkosningunum næsta vor.
Fyrirhuguð nýbygging þarna stingur illa í stúf við heildarmynd svæðisins, eins og Minjastofnun hefur bent á, og kannski ekki síður við það sem gæti verið – Vatnsmýrina, Tjarnarsvæðið og Háskólasvæðið eins og væri hægt að skipuleggja ef einhver heildarhugsun fengi að ráða ferðinni, ekki bara einhver bútasaumur. Skipulag Vatnsmýrarsvæðisins er nánast samfelld raunasaga síðan borgin leyfði lagningu hraðbrautarinnar þar í gegn.
Sunnanmegin á Háskólasvæðinu reis nýskeð hús Alvogen. Það er einstaklega stórt og klunnalegt og stingur illa í stúf við Norræna húsið og prófessorahverfið sem er næst því. Þetta á að tilheyra einhverju sem kallast vísindagarðar en er í raun verksmiðja. Nýi stúdentagarðurinn hefði svo orðið annar minnisvarði. alveg hinum megin á svæðinu, um það sem er farið að kalla gámaarkítektúr.
En það má rifja upp að sú bygging var valin eftir samkeppni meðal arkitekta. Þar komu fram fleiri hugmyndir, en þeim var hafnað. Meðal annars er teikningin hér að neðan sem er eftir Daníel Ólafsson, unnin í samvinnu við Pierre d’Avoine Architects í London. Hún hefur þann kost að hún er í talsvert meira samræmi við byggingarnar sem þarna eru fyrir og ekki í anda gámahúsanna sem er verið að byggja út um allan bæ. Ég ætla ekki að segja að endilega eigi að byggja svona, en þetta er valkostur.
