Bjarni Benediktsson er í vandræðum vegna lögbannsins á birtingu upplýsinga úr þrotabúi Glitnis sem fjallar um hann. En þetta virðist vera miklu stærri skjalabunki en það snúist bara um hann, og satt að segja er ekki sennilegt að Bjarni eða einhver sem er honum nátengdur hafi beitt sér fyrir lögbanninu.

En hvernig er lögbannið þá tilkomið, hverjir standa á bak við þennan gjörning? Það væri forvitnilegt að vita og hverju er verið að reyna að afstýra? Algengast er sem betur fer að aðferðir eins og þessar komi í kollinn á þeim sem beita þeim.

Það er beðið eftir því að Bjarni stígi fram og tjái sig. Hann mun væntanlega segja að lögbannið sé í óþökk sinni. En hans bíður líka að sannfæra kjósendur um að hann hafi ekkert að fela. Fyrir utan fyrstu fréttina sem birtist 9. október og fjallaði um sölu Bjarna á bréfum í Sjóði 9, höfðu hinar fréttirnar af Bjarna upp úr þessum skjölum ekki vakið sérstaka athygli. Þær fóru ekki á flug, en gera það nú.

Þarna er frétt sem birtist fyrir þremur dögum og segir frá 50 milljóna króna kúlulánaskuld og önnur frétt sem birtist í gær og fjallar um að faðir Bjarna hafi greitt upp skuldir fyrir hann.

Nú er farið að tengja þetta við leka sem var um fjármálaupplýsingar Hæstaréttardómara fyrr á þessu ári. Þar var líka um viðskipti í Glitni að ræða. Það mál mun enn vera í rannsókn hjá saksóknara eftir tilmæli frá Fjármálaeftirlitinu. Fjármálaeftirlitið mun væntanlega kæra þennan leka líka. En þá var ekki sett lögbann.

Eins og staðan er birtast varla fleiri fréttir úr þessum gögnum fyrir kosningar, að minnsta kosti ekki í Stundinni. Þrotabúið hefur viku til að rökstyðja lögbannið fyrir héraðsdómi, svo er hægt að vísa þeim úrskurði til Hæstaréttar.

En þetta er farið að setja verulegt strik í kosningabaráttu Sjálfstæðisflokksinns. Í staðinn fyrir að sækja fram og ná í fylgi á síðustu metrunum, eins og flokkurinn hefur oft gert, þá þarf formaður hans og eini óskoraði leiðtoginn að vera í sífelldri varnarbaráttu.