Ég hef áður nefnt það hér að ef lögreglan ætlar að fara að bera vopn til að vernda fólk á fjöldasamkomum, þá er ærið verk fyrir höndum að þjálfa fleiri lögreglumenn í vopnaburði og afla fleiri skotvopna. Því varla getur eftirlitið bara verið hippsum happs, á fáeinum af þeim fjölmörgu mannamótum sem haldin eru á Íslandi yfir sumarið.
Fjöldasamkomurnar ná hámarki um verslunarmannahelgina, en að auki eru haldin hestamannamót og bæjarhátíðir og margt fleira í þeim dúr. Ef á að hafa vopnað eftirlit með þessu, virðist lögreglan vera alvarlega vanbúin til þess.
Þess vegna er hætt við að maður álykti að þessi gjörningur sé fremur táknrænn en hitt – að þarna sé á ferðinni viss sýndarmennska. Eðli málsins samkvæmt er svona barátta það stundum, en þess þarf að gæta að viðbrögð séu hófleg og virðist ekki fálmkennd. Sumir hafa talað um tilraun til að „normalísera“ vopnaburð lögreglumanna – en varla ætlar maður lögregluyfirvöldum slíkt? Þó er vitað að innan lögregluliðsins eru öfl sem vilja endilega aukna vopnavæðingu.
Hinn bráðgáfaði Guðmundur Rúnar Svansson skrifar pistil um þetta á Facebook og orðar hlutina alveg prýðilega:
Þetta er ekki “slippery slope” rökvillan: Ef það er hugmyndafræði lögreglunnar að hún ætli að vera vopnuð á staðnum ef að hryðjuverkamaður lætur til skarar skríðar virðist nokkuð augljóst að hún þarf að vera það á nánast hvaða mannamóti sem er.
Mannkynssagan er full af stjórnendum, stjórnmálamönnum og herforingjum sem bjuggu sig undir síðasta stríð án þess að hafa neina “theory of mind” um óvininn. Þannig virðast sérfræðingar ríkislögreglustjóra hafa komist að þeirri niðurstöðu að fyrst það hafi verið talsvert um árásir hryðjuverkamanna á fjöldasamkomur síðustu misserin þurfi að gæta þeirra sérstaklega og að hafa það mjög sýnilegt.
Ég myndi telja nokkuð augljóst að það fyrirfinnst ekkert lögmál sem segi að árásir verði bara gerðar á fjöldasamkomur, eða það þurfi að endilega að vera líklegra. Þó terroristanum finnist sjálfsagt betra að drepa sem flesta, þá myndi ég nú samt halda að markmiðið sé fyrst og fremst að skapa ógn og fá athyglina, og það sé fyllilega nóg að drepa “bara” 3-5 eða svo. Og það er hægt að gera nokkuð víða. Sérstaklega ef lögreglan sjálf lætur vita hún verði á stórum mannamótum.
Það virðist frekar ósennilegt að það muni verða vopnuð lögregla á næstunni á árshátíðum meðalstórra fyrirtækja og uppúr og í öllum útskriftum úr leikskóla, opnunum listasýninga og auðvitað alltaf niðri í miðbæ um helgar. En ég stórefast samt um að sérfræðingar ríkislögreglustjóra séu með reikniformúlu sem segi að það verði að láta hryðjuverkaógn öllu smærra en 5000 manns samankomnum slæda þar sem það sé of mikil fyrirhöfn. Jafnvel þó hættumatið sé rétt (sem ég er ekki sannfærður um) sýnist mér að strategían sé ekkert sérstaklega vel hugsuð.
En við verðum að gera eitthvað!!! Hvað með börnin …
