Bláeygð og saklaus höfum við sett ógurlegt magn af upplýsingum um okkur sjálf á Facebook og aðra samskiptamiðla. Um líf okkar, fjölskyldu okkar, atvinnu – og skoðanir.
Við höfum líka látið afstöðu okkar í ljós með því að læka alls konar hluti – stundum oft á dag. Ekki bara um sæta kettlinga, heldur um stjórnmál og skoðanir.
Vissulega hefur verið varað við þessu, en fæstir hafa látið það hafa áhrif á sig. Það er vitað að fyrirtæki hafa nota upplýsingarnar sem þarna er að finna með ýmsum hætti. Í sjálfu sér er það óþægileg tilhugsun.
En nú eru að komast til valda öfl sem eru þess albúin að rýna í þessar upplýsingar og nota þær – til dæmis til að meta hvort við eigum að njóta ferðafrelsis. Þetta er býsna skuggaleg þróun og setur samfélagsmiðla í nýtt ljós.
Í öfgafyllsta tilvikinu getum við gert okkur í hugarlund ef til dæmis Stasi eða Gestapo hefði haft samfélagsmiðla til að moða úr í allsherjareftirliti sínu með borgurunum.
Rennur kannski upp sá tími að við hættum að læka – og lokum jafnvel Facebook-síðunum okkar, til að gæta eigin öryggis?
Ég nefni í framhjáhlaupi að vinir mínir í Tyrklandi, sem eru allmargir, eru alveg hættir að tjá sig um stjórnmál á Facebook.