Orðaleppur síðasta árs er „að hjóla í“. Þetta er sérstaklega mikið notað í fyrirsögnum – þar er alltaf einhver að hjóla í einhvern. Þetta er satt að segja afar flatneskjulegt, en fer vaxandi ár frá ári – eins og blaða- og fréttamönnum detti ekki annað orðalag í hug.
Karl Garðarson nefnir nokkur dæmi um þetta á síðu sinni hér á Eyjunni.
1) Björn hjólar í Fréttablaðið (Eyjan 07.12.16)
2) Vilhjálmur hjólar í Gylfa (DV 23.11.16)
3) Donald Trump hjólar í Alec Baldwin (Vísir 20.11.16)
4) Ingó hjólar í Iceland Airwaves (Vísir 7.11.16)
5) Sara Heimis hjólar í Rich Piana (Nútíminn 17.11.16)
6) Bjarni hjólar í borgaralaun (Mbl. 29.09.16)
7) Carragher hjólar í markvörð Liverpool (433.is 15.12.16)
8) Friðrik Dór hjólar í Bónus (Séð og heyrt)
9) Höskuldur hjólar í Sigmund (RÚV 06.09.16)
10) Brynjar Níelsson hjólar í Birgittu Jónsdóttur (fréttastofa.is 1.11.16)
11) Sigmundur Davíð hjólar í þjóðfélagsumræðuna (fréttastofa.is 20.10.16)
12) Hjörleifur hjólar í Svandísi sem segist vera döpur (T24 22.11.16)
13) Dagur B. hjólar í borgarbúa (martagudjonsdottir.blog.is 06.09.16)
14) Davíð hjólar í blaðamenn og Birgittu (Hringbraut 14.04.16)
15) Ragga hjólar í fjölmiðla (Bleikt.is 16.08.16)
16) Sunna hjólar í Eggert (Stundin.is 2.02.16)
17) HSG hjólar í WOW Cyclothon (hjalparsveit.is 14.06.16)
18) Birgitta hjólar í Viðreisn (Eyjan 16.11.16)
19) Benedikt hjólar í Frosta vegna fundar með Guðmundi í Brim (DV 24.11.16)
20) Logi Bergmann hjólar í fýlupoka (DV 11.06.16)
Nú er ekki eins og íslenskuna skorti orð um þetta, það mætti einfaldlega segja gagnrýnir, setur út á, gerir aðfinnslur, er ósammála, átelur, tekur til bæna, finnur að, setur ofan í við, mótmælir eða andmælir kemur líka til greina – og sjálfsagt geta lesendur síðunnar komið með fleiri tillögur.