Það er satt að segja dálítið langt gengið hjá eiganda ferðaþjónustufyrirtækis, sem stofnaði lífi ferðamanna í hættu upp á jökli, að kenna ferðamönnunum sjálfum um.
Þetta er fólk sem er algjörlega óvant í jöklaferðum og kann örugglega lítt að varast hversu veður eru válynd á íslenska hálendinu. Auðvitað er það ferðaþjónustuaðilinn sem ber ábyrgð. Við aðstæður eins og þessar hlýtur að þurfa að gæta ítrasta öryggis gagnvart fólki sem ekki þekkir aðstæður. Það er farið af stað þrátt fyrir stormviðvörun, en önnur fyrirtæki hættu við jöklaferðir. Mikill fjöldi björgunarsveitarmanna tók þátt í leit.
Á Facebook skrifar Kristján Jónsson sem er forstjóri fyrirtækis sem nefnist Iceland Discovery:
Jæja, ég ætla þá að segja það: Þetta er orðið ógeðslegt. Það er að segja, íslensk ferðaþjónusta, og ég veit það því að ég tek þátt í henni. Græðgi ferðaþjónustuaðila er hömlulaus og ábyrgðarleysið fullkomið. Ekki hjá öllum, því fer fjarri, en gikkirnir í veiðistöðinni eru bara of margir og of áberandi. Það er sama hvar fæti er stungið niður: rútur á leið í norðurljósferð í rigningu, fólki troðið í jökulagöngu í slyddu og aftakaroki, biðraðir við íshella sem eru aukinheldur nær ófærir vegna vatnselgs; hér ríkir algjört gullgrafaraæði og þetta er orðið ógeðslegt. Orðspor Íslands stefnir lóðbeint til helvítis en yfirvöldum málaflokksins er svo slétt sama á meðan allir monnípeningarnir flæða inn.