Lífið á samfélagsmiðlum er grunnfærið og það dregur úr samfélagslegri virkni. En það getur líka skaðað starfsferil fólks, ef marka má grein sem tölvufræðingurinn Cal Newport skrifar á vef New York Times.
Það er mjög útbreidd krafa að fólk sýni stöðuga virkni á samfélagsmiðlunum, því þar séu tækifærin og tengingarnar. Sé maður ekki á samfélagsmiðlum sé hætta á því að maður sé ósýnilegur. Hjá sumum er þetta næstum eins og kvöð um að vera eins manns fjölmiðill, sífellt að uppfæra.
Newport segir að þetta sé mikill misskilningur. Markaðurinn í kapítalísku samfélagi veiti umbun fyrir það sem er einstakt og dýrmætt. Það sé alls ekki hægt að segja um samfélagsmiðlana. Hver einasti unglingur með snjallsíma geti dreift grein á netinu eða búið til hashtag.
Að ímynda sér að með því að sinna þessari þarflitlu iðju af miklu kappi verði til eitthvað mikilsvert hljóti að vera hrein blekking.
Eitt viðkvæðið sé að þetta geti þó ekki skaðað, segir Newport. En hann er ekki sammála. Hann segir að mikilvægur eiginleiki í flóknu þjóðfélagi sé að geta einbeitt sér að einhverju, ná hæfni á einhverju sviði. Samfélagsmiðlarnir veiki þessa hæfileika – enda séu þeir hannaðir til að vera ávanabindandi. Þeim mun meira sem maður noti samskiptamiðla, þeim mun örvun þurfi hugurinn – og þeim mun meira hræðist hann hvern ávæning af leiðindum.
Samskiptamiðlarnir aftri þannig fólki frá því að vinna störf og skapa hluti sem skipta máli. Setjið niður símann, lokið netvafranum og farið að gera eitthvað almennilegt, segir hann.