Hvernig verður skoðanamyndun þegar við fáum meirihlutann af fréttunum sem við lesum í gegnum samskiptamiðla, Facebook einkum og sérílagi? Maður hlýtur að velta þessu fyrir sér nú rétt fyrir kosningar þegar flokkar og stuðningsmenn þeirra dæla út áróðri í gegnum samskiptamiðlana.
Fólk á náttúrlega sína, misjafnlega þröngu vinahópa á Facebook, og svo hafa líka áhrif algóriþmar sem netveitur eins og Facebook og Google nota til að velja fréttir og upplýsingar ofan í notendur sína.
Angela Merkel, kanslari Þýskalands, hefur nú stigið fram og krefst þess að netfyrirtæki svipti hulunni af þessum algóriþmum og segir að skortur á gegnsæi í þessu efni ógni stjórnmálaumræðu. Merkel segir að þarna sé hætta á að upplýsingarnar sem fólk fær til sín þrengist úr hófi fram.
Ýmsir fleiri hafa varað við hættunum sem felast í því að fólk fái einungis upplýsingar sem staðfesta viðhorfin sem það hefur þegar eða er mælt með af fólki með svipaðar skoðanir. Hugtakið „bergmálsherbergi“ hefur verið notað í þessu sambandi.
Á ensku er líka notað hugtakið filter bubbles, við lokumst inni í slíkri bólu, sjáum ekki upplýsingar sem gætu ögrað viðhorfi okkar eða heimsmynd. Þetta getur falið í sér ýmsar hættur fyrir lýðræðið.
Um þetta er fjallað í grein í Guardian. Myndin sem þar er dregin upp er nokkuð áhyggjusamleg. Þar er staðhæft að 44 prósent fullorðinna Bandaríkjamanna fái fréttir sínar í gegnum Facebook en 60 prósent af þeim sem eru af árþúsundakynslóðinni.
Vitnað er í Caleb Gardener, sem eitt sinn var ráðgjafi Obamas forseta í málefnum samskiptamiðla sem segir:
Ef þetta vekur þér ekki ugg, þá veistu ekki nóg um algoriþma Facebook. Ef þú átt foreldra sem styðja Trump eru þau að sjá allt annan fréttaheim en þú.