Í gær birti ég pistil þar sem ég gerði því skóna að líklegasta stjórnarmynstrið eftir kosningar væri Sjálfstæðisflokkur, Framsókn og Viðreisn. Af þessu spruttu miklar umræður á netinu.
Meðal þeirra sem gerðu athugasemd var Þorsteinn Víglundsson, sem skipar efsta sætið á lista Viðreisnar í Reykjavík norður. Hann tekur nokkuð sterkt til orða varðandi samstarf við Sjálfstæðisflokk og Framsókn.
Þetta virðist ætla verða vinsæl staðhæfing fyrir þessar kosningar. Ef áherslur Viðreisnar í sjávarútvegsmálum, landbúnaðarmálum, Evrópumálum og stjórnarskrá eru bornar saman við áherslur Sjálfstæðisflokks og Framsóknarflokks í sömu málaflokkum þá ber þar ansi mikið á milli. Í þessum málaflokkum er Viðreisn mun nær Bjartri framtíð og Pírötum. Fyrir frjálslyndan flokk sem vill stuðla að breytingum er ekki eftir miklu að slægjast í samstarfi við flokka sem lita á það sem megin hlutverk sitt að standa vörð um óbreytt ástand í þessum málaflokkum.