Vefur Berliner Zeitung, götublaðs í Berlín. Hér segir frá Íslendingi, þannig er það orðað í fréttinni og sagt að hann sé 43 ára,  sem sat í lest í Berlín og réðist að ungum manni með svívirðingum. Kallaði hann Bin Laden, spurði hvort hann ætlaði ekki að ákalla Allah og sprengja sprengju í lestinni. Segir að ungi maðurinn hafi varla brugðist við, heldur látið þetta yfir sig ganga.

Íslendingurinn reyndi að æsa aðra farþega upp á móti honum. Þá steig fram Alexander B. til varnar unga manninum. Urðu nokkrar stympingar sem enduðu með því að Íslendingurinn beit stóran hluta eyrans af Alexander.

Þetta mun hafa gerst á sunnudag samkvæmt frásögn blaðsins. Segir í fréttinni að tilraun verði gerð til að sauma eyrað á Alexander en Íslendingurinn sitji í varðhaldi og verði leiddur fyrir dómara á næstu dögum.

Og hér er fréttin eins og hún birtist hjá Bild Zeitung. „Brjálaður Íslendingur beit af mér eyrað.“