Ég setti eftirfarandi tilkynningu á Fésbókina síðdegis í gær:
Þetta eru frekar pínleg minnisglöp. Snemma í vor var ég í upptöku einhvers staðar í bænum og gleymdi frakkanum mínum, dökkgráum ullarfrakka. Nokkru seinna hringdi í mig kona og sagði að frakkinn væri á ákveðnum stað í bænum. Ég var á leið til útlanda og gat ekki sinnt þessu. Nú er ég búinn að gleyma hvaðan konan hringdi – og þ.a.l. hvar frakkinn er. En það væri gott að fá hann fyrir veturinn.
Aðeins fjórum mínútum síðar skrifar Jón Hjartarson, svona er Fésbókin áhrifaríkur miðill:
Sæll Egill. Ragnheiður kona mín segir að hann hangi inn á Dyngjuvegi hjá RSÍ.
RSÍ er skammstöfun fyrir Rithöfundasamband Íslands. Það er staðsett í húsi Gunnars Gunnarssonar rithöfundar (sem við fjöllum síðar um í Steinsteypuöldinni).
En frakkinn hefur semsagt verið í fatahengi Gunnars.
Það er eitthvað í þessu sem minnir á sögu eftir Braga Ólafsson.