Ég hef í sumar séð um útvarpsþátt á Rás 1 sem nefnist Undir áhrifum. Þátturinn er nokkuð fastur í forminu, þarna er spurt um hluti sem hafa áhrif á fólk á lífsleiðinni, staði, atburði, kennara, annað fólk, hugmyndir, bækur, tónlist og ýmislegt fleira.
Síðasti þátturinn í bili var á dagskrá í gær. Viðmælandi minn þar var Hildur Eir Bolladóttir, prestur í Akureyrarkirkju.
Þetta er mjög líflegt viðtal, Hildur er afar sjarmerandi og skemmtileg og segir vel frá. Í viðtalinu segir hún frá uppvexti sögufrægum stöðum, í Laufási og á Hólum þar sem faðir hennar var prestur. Móður með brennandi áhuga á pólitík. Heimili þar sem var mikil rækt lögð við bókmenntir, myndlist og fróðleik. Það kom í ljós að Hildur kann fjölda ljóða utanað. Hún sagði líka frá glímu sinni við kvíða og viðhorfum til prestskaparins og hvernig uppeldi hennar mótaði hana í því efni.
Viðtalið er að finna hér, á vef RÚV. Og með því að smella hérna er hægt að heyra fleiri þætti úr þessari röð. Viðmælandi minn í síðustu viku var Hilmar Þór Björnsson arkitekt sem margt hefur ritað um byggingalist og skipulagsmál.