Í fyrsta þætti Steinsteypualdarinnar, sem er sýndur í sjónvarpinu í kvöld, er útgangspunkturinn árið 1915. Þá um vorið fór að rísa hér „Steinsteypuborg á rústum timburhúsaþorps“, eins og Pétur H. Ármannsson orðar það. Pétur er meðhöfundur okkar Ragnheiðar Thorsteinsson að þáttunum.
Þá um vorið varð Reykjavíkurbruninn mikli sem geyddi timburhúsum í Miðbænum, sum þeirra voru vegleg stórhýsi. Að honum loknum þurfti nánast að byggja Miðbæinn upp á nýtt, þá var timbrinu úthýst, en menn fóru að reisa hús úr steinsteypu. Sum þeirra voru stór og glæsileg, eins og til dæmis hús Natans & Olsen, sem seinna var nefnt Reykjavíkurapótek.
Þarna hefst líka tímabil svokallaðrar steinsteypuklassíkur. Steinsteypuhús rísa í Kvosinni, en líka í hæðunum fyrir ofan hana. Hannes Hafstein byggir hús á Grundarstíg, Einar Benediktsson flytur inn í steinsteypuhús við Laufásveg, en merkasta húsið er þó Hnitbjörg, hús Einars Jónssonar myndhöggvara á Skólavörðuholti. Það er einstakt verk – í raun stærsta höggmynd listamannsins.
Í þættinum í kvöld skoðum við meðal annars Gnitbjörg, sem reis eins og gnæfur hamar, á Skólavörðuholtinu og stórbrotnar hugmyndir Einars Jónssonar um húsið. Við förum líka mjög sérstæða íbúð hans sem er á efstu hæð hússins.
Steinsteypuöldin er á dagskrá RÚV klukkan 20.10 í kvöld.