Það er aðeins farið að hitna í kolunum fyrir kosningarnar.

Viðtal Morgunblaðsins við Önnu Sigurlaugu Pálsdóttur, eiginkonu Sigmundar Davíðs Gunnlaugssonar, er greinilega upphafið að sókn hans til að halda formannsembættinu í Framsóknarflokknum, rétt eins og Facebook-færsla Önnu var upphafið að vörn hans þegar Wintris-málið kom upp síðla vetrar.

Það er alls ekki víst að honum takist þetta, en Framsóknarmenn eru mjög tvístígandi. Kjördæmasambönd hafa kveðið upp úr með að boða skuli til flokksþings, en tíminn er naumur. Miðstjórnarfundur sem halda á 10. september þarf að ákveða dagsetningu flokksþingsins og þá er varla hægt að halda það fyrr en í fyrsta lagi helgina á eftir, 17. september. Þá verða einungis fjörutíu dagar til kosninga.

Sigmundur lætur sér ekki annað til hugar koma en að vera formaður áfram, hann mun berjast hart fyrir sínu pólitíska lífi, og það er þá spurning hvort einhver fer á móti honum. Lilja Alfreðsdóttir, sem skipar fyrsta sætið í Reykjavík suður, var kölluð inn í pólitíkina af Sigmundi og virðist vera tygg honum. Þá er spurningin um Sigurð Inga Jóhannsson forsætisráðherra – áræðir hann að láta til skarar skríða? Sigurður hefur áður sagt að hann muni ekki bjóða sig fram gegn formanninum, en það dylst engum að þeir hafa fjarlægst hvorn annan verulega.

Þeir eru ólíkir menn Sigmundur og Sigurður Ingi. Það bætir ekki ástandið í flokknum að framsóknarmenn virðast ekki sjálfir hafa hugmynd um hvort þeim muni vegna betur með hinn rólyndislega Sigurð Inga í fararbroddi eða hinn umdeilda og nokkuð uppstökka Sigmund.