Þetta er mynd sem ég tók vestur á Ægissíðu um sólarlagsbil fyrir fáum dögum. Þau hafa verið mörg fögur sólarlögin í Reykjavík undanfarið. Maður man vart annað eins.
Þegar ég horfði á rauðgullinn kvöldhimin í gær kom upp í huga mér málarinn Þórarinn B. Þorláksson. Hann var fyrsti Íslendingurinn sem nam málaralist í útlöndum og sá fyrsti sem hlaut hélt eiginlega listsýningu hér á landi og hlaut opinbera styrki til að vinna að list sinni. Talinn einn helsti frumkvöðull í myndlist á Íslandi.
Þórarinn var landslagsmálari – og hann er ekki síst málari sumarnáttanna. Hann málar í Reykjavík, mótif sem við þekkjum vel þótt síðan hafi sprottið upp heil borg. Í verkum sínum fangar hann birtuna sem við höfum séð á sumarkvöldunum undanfarið. Sjáið tærleikann í myndunum og litina!
Þessi mynd er frá 1904 og kallast einfaldlega Sumarkvöld í Reykjavík. Það er stúlka sem situr á steini og horfir á sólarlagið en í fjarska siglir skip. Ég geri mér ekki alveg grein fyrir staðsetningunni, en þetta er kunnuglegt.
Þessi mynd hefur verið nefnd Sólarlag við Tjörnina. Hún er frá 1905. Þarna er horft yfir Tjörnina upp á Landakotshæð og Hólavelli.