Viðskiptaráð er félagsskapur sem lengi hefur boðað einhvers konar frjálshyggju-fúndementalisma – já, það má kalla það bókstafstrú.

Þetta má glöggt sjá í plöggum sem komu frá Viðskiptaráði fyrir hrun, til dæmis skýrslunni þar sem var boðað að Ísland yrði best í heimi með einkavæðingu heilbrigðiskerfins, menntakerfisins, orkunnar, náttúruauðlinda, afnámi verkalýðsfélaga, flötum sköttum og með því að viðskiptalífið hafi eftirlit með sjálfu sér.

Merkilegt er að sjá myndina sem er birt með nýrri skýrslu Viðskiptaráðs sem gengur mikið út á hvað opinber rekstur er hræðilegur.

Þarna eru menningarstofnanir eins og Sinfóníuhljómsveitin, Borgarleikhúsið, Íslenska óperan, Þjóðleikhúsið, Íslenski dansflokkurinn, Ríkisútvarpið og Menningarfélag Akureyrar. Einhvern veginn hefur líka Íþrótta- og tómstundaráð í Reykjavík komist inn á myndina, sem og skíðasvæði í Reykjavík, á Akureyri og Austurlandi.

Þarna eru sjóðir eins og Lánasjóður íslenskra námsmanna og Íbúðalánasjóður. Þarna er Veðurstofan, já hún, Ríkisendurskoðun, og svo fyrirtæki sem má telja mjólkurkýr: Duty Free, Isavia, Vínbúðirnar

Jú, þarna eru bankar sem féllu í umsjá ríkisins í uppgjörinu eftir hrun og verða þar sjálfsagt bara tímabundið. Landsbankinn, Arion og Íslandbanki. Það mætti reyndar nefna að meðan þeir eru í ríkiseigu væri kannski hægt að gera eitthvað í hinni geigvænlegu sjálftöku bankanna sem hefur stundað lengi – hinu skefjalausa peningaplokki sem þessar stofnanir sem við erum öll neydd til að skipta við stunda.

Og einhvern veginn hefur Landspítalinn komist inn á myndina. Landsvirkjun er reyndar ekki að sjá, en þarna er Rarik og Landsnet og Vinnumálastofnun.

Það er samt vandséð hvað á að  lesa úr þessari mynd nákvæmlega, þetta virkar svo ruglingslegt – en hún er á sinn hátt einhvern veginn dæmigerð.