Íslendingar geta stundum verið mikil hænsn. (Ég veit að ég á ekki séns í að bjóða mig fram sem forseta hafandi sagt þetta.)
Við erum aðilar að EES og Schengen, þetta þýðir í raun að við erum djúpt inni í Evrópusamstarfinu. Samt er talað um ESB hérna eins og það sé einhver hryllingur. Reiknað í prósentur erum við líklega með upp undir 60-70 prósenta aðild, við höfum bara ekkert um ákvarðanir að segja.
Samt er hérumbil aldrei rætt hvort við ættum einfaldlega að yfirgefa EES – fyrst þetta er svona ömurlegt allt.
Við gerðumst aðilar að EES og Schengen í stjórnartíð Davíðs Oddssonar. Þá var vandlega passað upp á að þessir samningar færu ekki í þjóðaratkvæði eða þjóðin fengi að segja skoðun sína.
Sem hefði náttúrlega átt að vera sjálfsagt miðað við hið gríðarlega fullveldisafsal. Því hefur verið haldið fram, með góðum rökum, að EES brjóti í bága við stjórnarskrá – og Schengen hugsanlega líka.