Guðni Th. Jóhannesson er sagnfræðingur og þegar hann spyr Davíð Oddsson hvort hann hafi enga sómakennd er það ekki alveg út í bláinn.

Í raun er þetta bein tilvitnun í fræg ummæli sem féllu á fundi bandarískrar þingnefndar 9. júní 1954. Öldungadeildarþingmaðurinn alræmdi Joseph McCarthy var sem fyrr að eltast við kommúnista sem hann sá í öllum hornum og meint áhrif frá þeim. Í þetta sinn var það sjálfur her Bandaríkjanna sem var til skoðunar.

Verjandi hersins var lögmaðurinn Joseph Nye Welch. Hann var á sjötugsaldri og naut mikillar virðingar. McCarthy lét það ekki aftra sér á að hefja árásir á hann og bendlaði ungan lögmann sem vann á stofunni hans við kommúnisma.

Þá var Welch nóg boðið og hann mælti fram hin frægu orð sem eru talin hafa verið upphafið að falli McCarthys – enda voru margir farnir að hugsa þetta sama:

Þú hefur gert nóg, hefurðu enga sómakennd lengur, herra minn?