Í janúar 1999 tók Kolbrún Bergþórsdóttir viðtal við Bjarna Guðnason sem nú er prófessor emeritus. Bjarni sat eitt sinn á þingi fyrir flokk sem nefndist Samtök frjálslyndra og vinstri manna. Þetta birtist í hinu sáluga dagblaði Degi. Bjarni fer á kostum í viðtalinu. Það rifjaðist upp fyrir mér þegar ég sá menn deila þessari ljósmynd hér á Facebook.
Þarna eru Jón Baldvin Hannibalsson og Davíð Oddsson að mynda Viðeyjarstjórnina svokölluðu vorið 1991. Þá varð Davíð Oddsson fyrst forsætisráðherra. Í viðtalinu við Bjarna er að finna bestu lýsingu sem ég hef séð á þessari stjórn, hann líkti henni við hjónaband höfðingjans Staðarhóls-Páls og Helgu Aradóttur, sonardóttur Jóns Arasonar, um miðja sextándu öld.
Staðarhóls-Páll var ágætt skáld og orti ástarljóð til Helgu. Eftir að ástin kólnaði breyttist kveðskapurinn. Þetta kvæði orti hann þegar komið var að skilnaði þeirra.
Ef leiðist þér, grey, að ganga,
gefa vil ég þér hest.
Segi eg upp sambúð langa,
svo trúi eg fari best.
Hafir þú fornt á fótum,
fá skaltu skæðin ný.
Gakktu hart á grjótum
og ganaðu upp í ský
með bandvettlinga og traf,
styttuband og staf.
Farðu norður í Gýgjarfoss
og stingdu þér þar á kaf.
Sökktu til botns sem blý
og komdu aldrei upp frá því.
Ég hygg að hugarþelið eftir Viðeyjarstjórnina hafi ekki verið miklu kærleiksríkara.
En svona var umbrotið á viðtalinu við Bjarna Guðnason í janúar 1999. Rifjaðist upp að hann var skemmtilegur stjórnmálamaður, þótt ferillinn þar yrði ekki langur – starfstími hans í íslenskum fræðum við Háskóla Íslands var mun lengri. Og svo var Bjarni auðvitað fótboltamaður líka, spilaði með landsliðinu og er sagt að honum hafi eitt sinn verið boðið að koma og leika með Chelsea.
Myndatextinn hér að neðan hefur ekki misst gildi sitt, nema síður sé.