Hjólreiðar eru ekki alveg jafn nýjar af nálinni og margir virðast halda – og maður þarf heldur ekki að vera klæddur spandexgalla til að stunda þær.

Hér er forsíða vikublaðsins Fálkans frá því í júní 1964. Þarna hafa nokkrir þekktir borgarar brugðið sér á reiðhjól eða myndast við að gera það.

Á myndinni má þekkja fremst Árelíus Níelsson prest, í röndóttum sokkum, Guðmund Jónsson söngvara, Kristínu Önnu Þórarinsdóttur leikkonu, Pál Ísólfsson organista, Matthías Johannessen ritstjóra, Indriða G. Þorsteinsson rithöfund, með hatt, Sigurð Sigurðsson íþróttafréttamann, Kristin Hallsson söngvara, Nínu Sveinsdóttur leikkonu og Jón Múla Árnason útvarpsþul.

Inni í blaðinu er svo að finna nokkurra blaðsíðna grein um þessa uppákomu og þar má lesa eftirfarandi brýningu. Mætti jafnvel kalla þetta „aðför að einkabílnum“.