Obama Bandaríkjaforseti kemur til Evrópu með mikilvægan boðskap. Evrópa verður að standa saman. Hann segir að heimurinn þurfi sterka, vegmegandi, lýðræðisinnaða og sameinaða Evrópu.
Obama segir að það komi ungu fólki, sem horfir á tölvuskjái og síma og sjái ekki neitt nema vondar fréttir, líklega á óvart að heyra að við séum að lifa mesta velmegunarskeið í sögu mannkyns.
En það sé hættulegt þegar hin sameinaða, friðsama, frjálslynda Evrópa fyllist af efasemdum um sjálfa sig og framfarirnar sem hafa orðið á síðustu áratugum.
https://www.youtube.com/watch?v=YrYPioWV1Bo
Það segir sína sögu að sama dag og Obama flytur þessa ræðu berast kosningaúrslit frá Austurríki, landinu þaðan sem nasisminn upphófst á sínum tíma. Frambjóðandi hægriöfgamanna vinnur stórsigur í fyrri umferð forsetakosninga.
Þetta er í því landi Evrópu þar sem ríkir hvað mest velmegun, en höfuðborgin, Vín, er einatt talin besta borg í heiminum til að lifa í.