Hér er mynd af einmana húsi sem ennþá stendur norðaustanmegin í Grjótaþorpinu, en nokkuð breytt. Húsið stendur við Vesturgötu 5 og var reist af Einari Benediktssyni 1898. Þarna er nú á jarðhæð leirkeraverkstæði Koggu, en þegar ég var að alast upp var þar reiðhjólaverkstæðið Baldur.
Á fáa staði í bænum átti maður oftar erindi í en Baldur, enda fór maður út um allt á reiðhjóli. Þar voru karlar í vinnusamfestingum, grómteknir og útataðir í smurolíu. Mér finnst eins og einn þeirra hafi talað með dönskum hreim.
Við sjáum á myndinni að húsið er nokkuð hrörlegt, það hefur verið lagað og fegrað eins og önnur hús í Grjótaþorpinu.
Í bakgrunninum sést beint upp í Garðastræti. Það er búið að byggja þarna fyrir en á þessum árum var þarna ennþá stór hlaðinn húsgrunnur, notaður sem bílastæði, það voru leifarnar af stórhýsinu Glasgow sem þarna stóð og var stærsta hús landsins þegar það var reist 1863, reist af skoskum kaupmönnum. Húsið brann 1903, en ennþá mótaði fyrir grunninum fram á níunda áratug 20. aldar. Þá var byggt hús sem meðal annars hýsir heilsugæslustöð Miðbæjar.
Aberdeen, Glasgow – í gömlu Reykjavík? Jú, það var vinsælt að nefna hús eftir borgum á Bretlandi. Liverpool var á Laugavegi, Manchester á Skólavörðustíg, tóbaksverslunin London í Austurstræti og önnur tóbaksverslun, Bristol, í Bankastræti. Ég er minntur á að verslunin Edinborg hafi líka eitt sinn verið til.
Myndina setti Karl Gustaf Smith inn á vefinn Gamlar ljósmyndir. Hann segir að hún sé tekin 1984 eða 1985. Samkvæmt borgarskipulagi frá fyrri hluta sjöunda áratugarins stóð til að rífa allt Grjótaþorpið. Þeir byrjuðu á hinum endanum, Túngötumegin. Þetta sýnir hvað er nauðsynlegt að alltaf sé hægt að endurskoða skipulag í samræmi við breyttan tíðaranda.
Á Selfossi hafa verið uppi hugmyndir um að byggja eftirlíkingar af sögufrægum húsum. Hér er tölvumynd af Glasgow sem finna má á vef sem tengist þessu verkefni.