Kiljan fer aftur á loftið á vormisseri í kvöld. Bækur eru ekki hættar að koma út þótt jólin séu búin.
Við fáum til okkar Halldóru Thoroddsen með Tvöfalt gler, stutta skáldsögu sem fékk Fjöruverðlaunin um daginn. Hún fjallar um gamla konu sem býr við Lindargötu og verður ástfangin.
Við birtum viðtal við hinn stórkostlega Kim Leine, höfund Spámannanna í Botnleysufirði, skáldsögu sem fékk bókmenntaverðlaun Norðurlandaráðs 2013, gerist í Kaupmannahöfn og á Grænlandi undir lok 18. aldar.
Við fjöllum um hinar merku Napólísögur Elenu Ferrante sem fara sigurför um heiminn. Þetta eru fjórar bækur sem segja frá vinkonum sem alast upp í fátækrahverfi í Napólí á árunum eftir stríð, hin fyrsta, Framúrskarandi vinkona, er komin út á íslensku, en von er á bók númer tvö.
Í Bókum & stöðum förum við að Möðruvöllum í Hörgárdal þar sem koma meðal annars við sögu Skáld-Rósa, Bjarni Thorarensen og Bólu-Hjálmar.
Hildur Eir Bolladóttir, prestur á Akureyri, velur svo uppáhaldsbækur sínar. Hún er meðal annars hrifin af Guðbergi, þó ekki öllum pistlunum hans.
Hér er svo Facebook síða Kiljunnar þar sem birtast reglulegar uppfærslur um efni þáttarins, brot úr honum og ýmislegt fleira.
