Bestu leikföng sem Kári hefur fengið þetta haustið eru nokkrar spýtur sem gamall vinur minn, smiður, gaf okkur. Það eru ekki bara reknir naglar í þessar spýtur, heldur eru þær notaðar með ýmsum hugvitsamlegum hætti.
Við vorum til dæmis að velta fyrir okkur um daginn hvort við gætum smíðað úr þeim geimflaug. Okkur sýnist nefnilega að útitaflið í Lækjargötu gæti veri fyrirtaks skotpallur fyrir ferðalag úti í geiminn.
Kári spurði hvort við þyrftum ekki að taka með okkur nesti. Velti svo fyrir sér hvort við myndum sofa yfir nótt úti í geimi. Kannski á Tunglinu eða Mars.
Á sama tíma les ég að Íslendingar hafi keypt leikföng fyrir 70 milljónir í dótabúðinni Toys R Us um helgina.
Málið er bara að fyrir flesta almennilega krakka er nóg að hafa nokkra playmókarla og spýtur. Það þarf ekki að vera neitt meira. Yfirleitt er reglan að þeim mun flóknari sem leikföng eru, þeim mun leiðinlegri eru þau.