Gísli Marteinn segir að rétt sé að byggja í Vatnsmýri og Örfirisey áður en farið er með byggðina út á Geldinganes. Hann tekur fram að flestir borgarfulltrúar séu fylgjandi því að flugvöllurinn fari úr Vatnsmýri. Það má líka geta að á skipulagi er gert ráð fyrir að hann víki.
Það er rétt hjá Gísla að það er mikil tímasóun fyrir borgarana, óhagkvæmt og óumhverfisvænt, ef þeir eiga ekki annan kost en að aka langar leiðir í vinnu. Ef leiðin milli vinnunnar og heimilisins lengist stöðugt. Þetta mun ekki ganga til lengdar. Við verðum líka að hyggja að því að byggingarland er ekki ótakmörkuð auðlind. Kópavogur hefur bruðlað mjög með land sem brátt verður uppurið – það er dálítið sorglegt að fara upp að Elliðavatni og sjá blokkirnar rísa við himinn.
Það er ekki aðlaðandi hugmynd að Reykjavík færist upp á Kjalarnes.
Það er sjálfsagt að standa vel að flugsamgöngum í bæinn. Nýleg úttekt sýndi að hagkvæmara er að setja flugvöll upp á Hólmsheiði eða út á Löngusker en að hafa hann á sama stað – í beinhörðum peningum talið.
Keflavík er auðvitað kostur líka – það er eiginlega ráðgáta hversu langan tíma hefur tekið að tvöfalda Reykjanesbrautina (leigubílsstjóri sem keyrði mig um hana um daginn hafði þá kenningu að Sturla hefði ekki kært sig um að þetta gerðist hraðar).
En dagar flugvallarins í Vatnsmýri eru brátt taldir. Umferð um hann mun minnka aftur þegar framkvæmdunum miklu fyrir austan líkur. Það er engin ástæða til að halda honum úti sem lendingarstað fyrir milljarðamæringa á einkaþotum og þyrlum.