Um daginn settist hjá mér á erlendum flugvelli dyggur sjálfstæðismaður og mikill andstæðingur Evrópusambandsins og tók að fjölyrða um kosti þess að taka upp annan gjaldmiðil en krónuna. Taldi að flokksbræður sínir myndu brátt sjá ljósið í því efni. Þeir ættu bara svolítið erfitt að skipta um stefnu. Sjálfstæðismaðurinn taldið að Davíð hefði hlaupið á sig þegar hann kallaði þessa umræðu sprenghlægilega.
Ég kallaði þetta valgerðarisma – í gríni. Það er bara vegna þess að Valgerður Sverrisdóttir hélt því fram að hægt væri að taka upp evruna án þess að ganga í ESB. Þessu mótmæltu sjálfstæðismenn kröftuglega – voru sumir reiðir.
Ég tel ekki að þetta hugtak nái fótfestu í málinu og ætlast ekki til þess.
En það eru margir að velta þessu fyrir sér. Í Viðskiptablaðið skrifar höfundur undir yfirskriftinni Huginn og Muninn. Ég hef þá kenningu að þetta sé sjálfstæðismaðurinn Andrés Magnússon, mikill stuðningsmaður Björns Bjarnasonar.
Í pistli H & M í síðustu viku eru vangaveltur um hvort Björn sé rétti maðurinn til að stýra málum ef færi svo að Ísland tæki upp evru án ESB-aðildar:
„Í hausthefti tímaritsins Þjóðmála skrifar að venju Björn Bjarnason, dómsmálaráðherra, pistil af vettvangi stjórnmálanna. Að þessu sinni drepur hann á Evrópumálin, nánar tiltekið um Ísland og evruna, og rifjar upp hvernig menn hafi löngum staðið í röðum til þess að útskýra alla heimsins meinbugi á því að unnt væri að taka upp evruna án þess að gerast aðili að Evrópusambandinu (ESB). Að undanförnu hafi hins vegar komið sannfærandi rök fyrir því að svo væri alls ekki. Niðurstaða Björns er að Íslendingar þurfi hvorki að spyrja kóng eða prest að því hvaða gjaldmiðil þeir nota, evruna eða aðra, án þess að hann sé sannfærður um skynsamlegt sé að kasta krónunni. En verði það nú niðurstaðan, væri þá nokkur maður til þess betur fallinn að stýra því ferli en Björn? Minna má á, að á sínum tíma stóð nánast sami kór og söng um það hvernig Íslendingar gætu ekki orðið aðilar að Schengen-samkomulaginu án þess að ganga í ESB. Björn gekk hins vegar í málið og leysti á mettíma, á mælikvarða ESB.“