Við komumst ekki ýkja langt með því að kenna ástandinu í Miðausturlöndum eða stéttaskiptingu um hryðjuverkin í Bretlandi.

Það virðist vera að mest af þessum tilræðum séu framin af ungum körlum sem eru búsettir í Bretlandi og aldir upp þar. Þeir hafa yfirleitt notið góðrar menntunar – geta hæglega notfært sér þau tækifæri sem vestrænt lýðræðisþjóðfélag hefur upp á að bjóða.

Þeir þjást af rótleysi, leiða og einhvers konar nihilisma. Eru auðveld bráð fyrir þá sem boða ofstæki og hatur. Það er ótrúlegt þegar læknar koma fyrir sprengjum sem hafa þann tilgang að valda sem mestum skaða á lífi og limum saklauss fólks.

Það eru margar hættur í þessari stöðu. Ein er sú að hryðjuverkin ágerist og viðbrögð samfélagsins sem verða fyrir barðinu á þeim verði ofsafengnari. Bretland er mjög viðkvæmur staður – kannski að hluta til vegna þess að terroristarnir eiga erfiðara með að komast inn í Bandaríkin.

Það er nauðsynlegt fyrir múslima að taka til í sínum eigin ranni. Hafna hryðjuverkum skilyrðislaust. Gera greinarmun á íslamstrú og íslamismanum sem er pólitísk öfgahreyfing. Uppræta hann úr moskum Vesturlanda. Þeir þurfa líka að starfa með lögreglu við að uppræta bölið.

Þetta er algjörlega í þeirra hag. Annars er hætta á að ástandið versni og við förum að sjá einangrunarbúðir – eða eitthvað í líkingu við það – á Vesturlöndum innan fárra ára.

Við verðum líka að gera okkur grein fyrir því að íslamisminn er hugmyndafræði í ætt við fasisma. Honum er í raun alveg sama um Palestínu eða Írak. Það vill bara svo til að þar eru vígvellirnir núna.