Halldór Laxness skrifar um það í Atómstöðinni að synir betri borgara hafi haft það að skemmtun að sprengja lögreglustöðina á gamlárskvöld.

Eins kynlegt og það kann að virðast, þá var þetta svona í eina tíð. Ungt fólk þyrptist í bæinn á gamlárskvöld og hafði uppi alls kyns óspektir – eins og sjá má í meðfylgjandi frétt frá 1947.

Lögreglan stóð í bardögum við þessi ungmenni, en það er minna um þetta talað en átök sem urðu út af pólitík.

Þessi siður lagðist svo af þegar leið á öldina. Það var til dæmis gripið til þess ráðs að halda brennur í hverfum borgarinnar til að halda fólki frá miðbænum.

Svo þegar sjónvarpið var stofnað var þetta ekkert vandamál lengur – þá sat fólk heima hjá sér og horfði á áramótaskaupið. Og gerir enn. Gamlárskvöld er ekkert sérlega róstusamt í miðborginni – eða tala menn ekki alltaf um „eril“ þegar fylleríið fer úr böndunum?

Ég er reyndar að lesa stóra bók eftir Stephen Pinker sem nefnist The Better Angels of Our Nature. Hann heldur því fram að við lifum á friðsömustu tímum í sögu mannkynsins og leitar skýringa á því að ofbeldi hefur minnkað.

Með þessari litlu upprifjun óska ég lesendum síðunnar gleðilegs árs – og þakka fyrir árið sem var að líða.