Yfirleitt bregst það ekki að í desember fara fjölmiðlar að flytja fréttir um hversu hræðilega vont veðrið sé utandyra, ekki síst í miðborg Reykjavíkur, og að nánast sé óðs manns æði að vera þar á ferðinni.

Svo er talað um að allt sé fullt út að dyrum í Kringlunni og Smáralind.

Í gær bar þó svo við að veðrið var einstaklega fallegt. Sönn vetrarblíða, milt frost, stilla, bjartur himinn – sérlega ágætt að vera úti ef maður á góða úlpu eða frakka, húfu og vettlinga.

Miðbærinn var líka fullur af fólki – þar voru miklu fleiri en nokkurn tíma myndu rúmast í verslunarmiðstöðvum. Líklega hefur bærinn aldrei verið jafn fagurlega skreyttur og fyrir þessi jól – búðirnar voru opnar fram á kvöld.

Það er spáð sama ágæta veðrinu í dag og næstu daga.

Á þessu gamla jólakorti gengur jólasveinn upp Bankastræti. Viðskiptahættir þar hafa breyst svo sumir eru farnir að kalla götuna Flísstræti. Það er gaman að labba alla leið frá Aðalstræti upp að Hlemmi. Á Ingólfstorgi er jólamarkaður en í stórhýsinu þar sem eitt sinn var Domus og síðar Gallerí 17, hefur opnað glæsilegt vöruhús með íslenskri hönnun.