Ég hef sérlega gaman af því að horfa á frjálsar íþróttir á Ólympíuleikum, þannig hefur það verið síðan ég var strákur og við Oddur Sigurðsson vinur minn vorum algjörir sportidjótar.

Afrek mín á íþróttasviðinu eru mjög takmörkuð, en Oddur varð magnaður hlaupari – keppti á Ólympíuleikum og á ennþá Íslandsmet. Ferill Odds var reyndar dálítið skrítinn, því hann var næstum kominn á fullorðinsár þegar uppgötvaðist hvað hann hafði mikla hlaupagetu. Var í sumarvinnu á bensínstöðinni úti á Birkimel og álpaðist út á Melavöll þar sem hann var uppgötvaður.

Ég reyni enn að horfa á frjálsu íþróttirnar á Ólympíuleikunum – þær eru yfirleitt hápunkturinn. Nú ber svo við að það er skemmtilegra en nokkru sinni að fylgjast með keppninni, ekki vegna þess að árangurinn sé betri, heldur vegna þess að maðurinn sem lýsir henni í islensku sjónvarpi fer algjörlega á kostum.

Hann heitir Sigurbjörn Árni Arngrímsson – og glæðir íþróttirnar lífi með þekkingu sinni, tilfinningu, tungutaki og skemmtilegheitum.  Hann er ein af stjörnum leikanna. Eins og einhver sagði:

„Hann gæti lýst kapphlaupi milli snigla og það yrði skemmtilegt.“