Skiptir máli hvort forseti Íslands sé kristinn – og þá fylgjandi hinum lútersk-evangelíska sið sem er þjóðkirkja Íslands?

Forsetinn þarf stöðu sinnar vegna að sækja trúarathafnir. Það er kirkja við embættisbústað hans.

En það er líka trúfrelsi á Íslandi og hér er fólk sem aðhyllist mörg trúarbrögð – og sumir eru ekki trúaðir eða jafnvel andstæðingar trúarbragða.

Þannig að þetta ætti í raun ekki að vera neitt mál.

Þóra Arnórsdóttir segist ekki vera kristin, ég man að Ólafur Ragnar Grímsson var ítrekað spurður að þessu í kosningunum 1996 og það var allt heldur vandræðalegt. Þá mátti ljóst vera að Pétur Kr. Hafstein væri vel kristinn, en uppi voru efasemdir um Ólaf. Þetta var hugsanlega meira mál þá en það er nú.

Svo er kannski spurning hvort brátt verði farin sú leið að skilja á milli ríkis og kirkju, líkt og frændur okkar Norðmenn hafa gert – við fögnuð norsku kirkjunnar?