Það er eitthvað heillandi við draugaskip.

Hið mannlausa skip Lyubov Orlova er sagt reka stjórnlaust um Norðurhöf – í átt til Íslands og Noregs.

Þetta er fjögur þúsund tonna skip, engin smásmíð.

Og sagt vera fullt af rottum.

Þetta er eins og úr sögu eða kvikmynd, og yfir þessu einhver annarleg, hrollvekjandi fegurð.

Ég kom einu sinni í höfnina í Port Said í Egyptalandi. Hún er risastór og víða gat að líta stór skip sem voru að ryðga í sundur, eins og þau hefðu ekki verið hreyfð í ár eða áratugi.

Það var eitthvað við þessa sjón sem olli því að maður gat ekki slitið sig frá henni.

En rotturnar í Lyubov Orlova hafa varla nóg að éta. Maður þarf ekki mikið hugmyndaflug til að sjá hvernig það getur farið.

Einn vinur minn á Facebook stakk upp á að þegar skipið kæmi að Íslandsströndum væri bara ein, risastór, rotta eftir.