Hér er skemmtileg jólafrétt og jólaauglýsing – brot úr gömlu Reykjavík.
Þarna er fólk samankomið að morgni, rétt fyrir jól, til að fá hvítöl á brúsa í Ölgerð Egils Skallagrímssonar sem þá var við Rauðarárstíg.
Fólk kom með stór ílát til að ná í ölið sem freyddi af krana. Það var einstaklega bragðgott – altént er það betra í minningunni en hvítölið sem er selt í plastflöskum í búðum. Eða kannski var það athöfnin sem gerði þetta skemmtilegt.
Nú er líka farið að selja hvítöl í dósum blandað saman við appelsín – mér varð óvart á að kaupa það um daginn – það er dísætur andskoti og bragðvondur eftir því.
Þarna mynduðust oft langar biðraðir og best var að koma snemma morguns.
Ég náði í þessar myndir af Facebook síðu Eggerts Þór Bernharðssonar sagnfræðings. Hann vann við hvítölssöluna og þaðan man ég fyrst eftir honum.