Samkvæmt tölum frá Hagstofunni er hagvöxtur á Íslandi miklu minni en spáð hefur verið. Fyrstu níu mánuði ársins er hann ekki nema 0,5 prósent.
Þjóðfélagsumræðan undanfarna mánuði hefur miðað við að hér sé góður hagvöxtur, en sé þetta rétt er annað uppi á teningnum. Spárnar höfðu gert ráð fyrir að hagvöxturinn yrði á bilinu 2,7 til 3,1 prósent.
Þarna virðist ekki síst hafa áhrif að vöxtur í einkaneyslu er minni en gert var ráð fyrir. Það má spyrja hvort laun í landinu séu ekki svo lág að litlar líkur séu til að einkaneyslan vaxi að ráði? Víðast á Vesturlöndum er líka stöðnun í einkaneyslunni og hagvöxtur lítill sem enginn.
Við Íslendingar höfum gengið í gegnum skeið lánadrifinnar einkaneyslu með tilheyrandi hagvexti, en það er tæplega að gerast núna – ekki einu sinni þótt húsnæðisskuldir landsmanna hafi verið færðar niður.
Kannski tekur einkaneyslan kipp þegar líður að jólum. En það er þó frekar ólíklegt. Fæstir upplifa árferðið þannig að ástæða sé til að fara á eyðslufyllerí um jólin.
Hér má benda á merkilegt blogg sem Stefán Ólafsson birtist í fyrra hér á Eyjunni þar sem er sýnt að tímakaup á Íslandi er óeðlilega lágt miðað við ríkidæmi þjóðarinnar, þ.e. landsframleiðsluna.
Eins og Stefán sagði þá:
Kauphækkun eykur einkaneysluna sem skapar fyrirtækjunum meiri sölufæri, fleiri störf verða þá til og skatttekjur hins opinbera hækka, sem gerir aftur mögulega hækkun lífeyris og launa opinberra starfsmanna, í sama takti.