Þessi dásamlega ljósmynd birtist á jóladagatali listasafns Einars Jónssonar (sem er einn merkilegasti staður í Reykjavík).
Segir í meðfylgjandi texta að þetta kort hafi borist safninu jólin 1944. Það ár var Sveinn Björnsson kosinn forseti hins nýja íslenska lýðveldis – þrátt fyrir heimstyrjöld var bjartsýni í lofti.
Þarna sést hvernig forsetanum var fagnað þegar hann kom að Álafossi í Mosfellssveit. Á þeim tíma var ullarverksmiðjan þar talsvert veldi undir forystu glímukappans Sigurjóns Péturssonar. Þéttbýlið í Mosfellssveit fór að myndast í kringum verksmiðjuna og svo í kringum heilsuhælið Reykjalund þegar hann hóf starfsemi stuttu eftir stríð.