Ég rakst á þessa mynd af plötu sem ég átti þegar ég var lítill strákur og hlustaði oft á. Kannski fyrstu kynni mín af klassískri músík – ásamt Árstíðum Vivaldis með ítalska kammerhópnum I Musici sem var líka til heima.
Þetta er Pétur og úlfurinn eftir Prokofieff. Leikinn inn á plötu 1956 af Sinfóníuhljómsveit Íslands undir stjórn Dr. Václavs Smetácek. Helga Valtýsdóttir segir söguna, ég held að systir hennar Hulda hafi þýtt. Þær voru þá með barnatíma í útvarpinu.
Það var Fálkinn sem gaf út plötuna sem naut mikilla vinsælda. Hún var tíu tommur að stærð – semsagt nokkuð minni en venjuleg lp-plata.
Á hulstrinu má sjá merki Sinfóníunnar frá þessum tíma – það sést ekki núorðið. Mér sýnist þetta vera fiðla og óbó innan í hring, en í ytri hringnum er nafn hljómsveitarinnar.
Umslag plötunnar er sérlega fallegt. Það væri gaman að vita hver listamaðurinn er.