Líklegt er að mesta virðingarstaða á Íslandi losni bráðum – og er þá meðtalin staða forseta Íslands.
Þetta er embætti forseta Hins íslenska bókmenntafélags.
Bókmenntafélagið er elsti og virðulegasti félagsskapur á Íslandi, stofnað 1816 af sjálfum Rasmusi Christian Rask, málfræðingnum sem átti stóran þátt í að bjarga íslenskri tungu.
Ýmsir merkir menn hafa verið forsetar Bókmenntafélagsins, þeirra frægastur Jón Sigurðsson. Jón var kallaður forseti vegna þess að hann var í forsæti hjá Bókmenntafélaginu.
Sigurður Líndal hefur gegnt embættinu frá 1967 – í næstum hálfa öld. Endurnýjunin er ekki mjög hröð hjá félaginu, síðustu öldina hafa einungis verið sex forsetar. Hermt er að Sigurður hyggist brátt láta af störfum – ljóst er að ekki hver sem er getur tekið við.
Jón Sigurðsson var forseti Bókmenntafélagsins 1851 til 1879.