Óskarsverðlaunin bera vitni um feiklega sterkt ár í kvikmyndum, þrátt fyrir kenningar um að mestur kraftur í sköpun myndmáls sé kominn í sjónvarp.

Myndir sem eru tilnefndar eru hver annarri sterkari. Boyhood sem er tekin á þrettán ára tímabili og segir frá uppvexti drengs frá því hann er sex ára og þar til hann verður átján. Einstakt verk sem setur ný viðmið.

Grand Budapest Hotel er eftir hinn stórsnjalla Wes Anderson, léttgeggjuð kómedía sem endurskapar heim Mið-Evrópu frá því milli stríða – í myndinni er þess beinlínis getið að hún sé undir áhrifum frá Stephan Zweig.

Whiplash er einhver besta tónlistarmynd síðari ára, segir frá dreng sem vill skara framúr í djasstrommuleik og kennara hans sem beitir býsna óhefðbundnum aðferðum. Sjaldan hefur maður séð tónlist gerð jafngóð skil með myndmáli og þarna.

Sjálfur er ég ekki jafn hrifinn af Birdman. Fannst orðavaðallinn í henni nær óbærilegur. Yfirbragð hennar er dökkt og dálítið þrúgandi, saga um gamlan kvikmyndaleikara sem ætlar að skapa sér nafn leiksviði á Broadway en lendir í óbærilega hrokafullum meðleikara sem yfirskyggir hann. Allt er þetta vel gert – en pínu tilgerðarlegt.

American Sniper eftir Clint Eastwood líst mér ekki á, þar er á ferðinni upphafning stríðsreksturs, en The Imitation Game heillar. Hún segir frá vísindamanninum Alan Turing sem öðrum fremur átti þátt í að ráða dulmál nasista í svokallaðri Enigma-áætlun. Turing varð síðar fyrir miklum ofsóknum vegna þess að hann var samkynheigður.

Af erlendu myndunum sem eru tilnefndar hef ég séð tvær, báðar frábærar. Leviathan er stórkostlegt skáldverk sem segir frá valdníðslu og kúgun í Rússlandi Pútíns. Glögg lýsing á þeim skelfilega heimi í hnotskurn. Ida er pólsk mynd, gerist á sjöunda áratugnum, og segir frá ungri konu sem er að fara að taka nunnuheit. Þá kemst hún á snoðir um fjölskylduleyndarmál frá tíma þýska hernámsins.

Rússneska myndin Leviathan er talin líklegust til að hreppa Óskarsverðlaun sem besta erlenda myndin. Hún gerist norður við Barentshaf, byggir lauslega á Jobsbók, og lýsir í hnotskurn spillingunni og geðþóttavaldinu í Rússlandi Pútíns.